وداعا إبراهيم نصر.. ملك الكاميرا الخفية

مش أي حد يعرف يرسم الضحكة على الوشوش ويخليك تضحك من القلب، في بداية التسعينات كانت الأسرة بتتجمع من الصغير للكبير في شهر رمضان منتظرين برنامج "الكاميرا الخفية"، وكنت تسمع أصوات الضحك وتشعر بالبهجة في المكان، مهمة مش سهلة بس قدر يعملها راسم الضحكات وصانع البهجة والفرح، الفنان القدير إبراهيم نصر اللي توفى الثلاثاء اللي فات عن عمر 70 عاماً، ليشاء القدر أن الشهر اللي شهد تألقه وأضحك الملايين هو نفس الشهر اللي ودعنا فيه.

قدر يسيب بصمة كبيرة في مجال الفن مش بس في عالم برامج المقالب والكاميرا الخفية اللي قدمه لسنين وجسد خلاله العديد من الشخصيات الكوميدية اللي محفورة في أذهاننا لحد دلوقتي، أشهرها "زكية زكريا".

ولد نصر سنة 1950 في القاهرة لأب من محافظة أسيوط، بدأت موهبته الكوميدية تظهر وهو صغير لما كان بيقلد قرايبه، وفي كل مرحلة من مراحل تعليمه كان يبرز حبه للتمثيل، حصل نصر على ليسانس الآداب عام 1972.

بدأ حياته الفنية كمونولوجيست، وشارك في برامج الأطفال، وقدم أعمال تلفزيونية منها "الزمن المر"، و"حكاية لها العجب"، بجانب مشاركته في أفلام كتير زي "شمس الزناتي"، "بيت بلا حنان"، "قهوة المواردي"، "زكية زكريا في البرلمان"، "الاحتياط واجب"، "حد السيف"، "امرأة واحدة لا تكفي" و"إكس لارج".

مش بس كده دخل كمان عالم المسرح، وبداية الطريق كانت مشاركته مع سمير غانم في مسرحية "أهلا يا دكتور"، بجانب مسرحيات تانية ومنها "زكية زكريا والعصابة المفترية" و"عائلة عصرية جدا".

رحل الفنان القدير إبراهيم نصر عن عالمنا بس هيفضل عايش جوانا يرسم ضحكتنا على وشوشنا من خلال أعماله.

مصادر

https://bit.ly/3cA5Q5i
https://bit.ly/2Wtoo1k