خاص.. تفريغ مكالمات مُعدة «صبايا» الخير والوسيط فى خطف الأطفال ( ! )

ينفرد «الدستور» بنشر "نَصّ تفريغ مكالمتين" بين المتهم الثالث- في قضية التحريض على خطف الأطفال، المتهمة فيها الإعلامية ريهام سعيد وعدد من فريق عمل برنامج صبايا الخير- ويدعي "إسلام" الوسيط الرئيسي، وبين كل من "محمد طه سيد" سائق في "أوبر"، والمُعدة "غرام عيسى". وكانت نيابة شرق القاهرة، طلبت من شركات المحمول، تفريغ المكالمات الصوتية بين كافة المتهمين في القضية المعروفه إعلاميا "بخطف الأطفال"، حيث تم تفريغ تلك المكالمة. * المكالمة الأولى.. محمد: إيه يا معلم عامل إيه إسلام: الحمد لله تمام محمد: معلش بقا لسه صاحي قولت أنام ساعتين قبل ما أطلع أشتغل إسلام: الله يعينك يا باشا محمد: أنا مش آخر مرة كلمتك في التليفون وقولتلك هبعتلك الفيديو علي أساس إنك هتوريه للوليه لما قولتلي دي هي بتقولي لا ابعتلها الفيديو إنت ؟ إسلام: آه محمد: وبعدين لما كلمت الوليه قالتلك لا هي تضمن منين إن العيال معايا كنت عايزة آجي أبُصّ عليهم إسلام: آه محمد: يا عم عادي يا عم أجيبلك، ما أنا كده كده معايا العيال السريِّحة، كلهم معايا، ماكانش كده هسحب لك حد إسلام: آه محمد: المهم إنت عاوز حد منهم، ولا أقول للناس إن إحنا مالناش في الحوار وخلاص ف أنا قولت أرشقك في المصلحة دي يا صاحبي ولو مش عاوز ترزق خلاص إسلام: هما الناس قالوا يا في ميدان لبنان أو الدقي أو المهندسين محمد: هنتقابل هناك يعني؟ إسلام: آه المصلحة هتخلص في مكان من دول يعني محمد: أنا مش هتفرق معايا حتي لو في العربية خد وهات ونخلص يعني أنا مش هتفرق معايا أوي يعني إسلام: تمام تمام محمد: بس وحياة أبوك تنجز وقول للوليه اللي هتاخد العيال دي إن مش هينفع العيال دي تبات عندي إسلام: ياعم ما تقلقش والله هي هتيجي تشوف العيال وتخلص معاك في الفلوس المهم بس وإنت نازل بالعيال عدي علي سوبر ماركت هاتلهم حاجات حلوة ولعب محمد: يا عم وربنا ما معايا فلوس اجيبلهم حاجة دا أنا هجيلك بالعافيه إسلام: خلاص يا عم اتفقنا يبقي على ميعادنا وبكره هنخلص فيهم ماتقلقش * المكالمة الثانية.. غرام: بقالي مدة برن عليك وبقولك خد يا إسلام تبصلي ومش بترد عليا ؟ إسلام: أصل أنا مش محترم وأهلي ماربونيش غرام: واللهي دي بتاعتك إنت دي بقي إسلام: أنا سايب شغلي علشان حضرتك غرام: أيوة يا ابني إنت ناسي إني هروح النهاردة، يعني هروح بالليل إسلام: أنا مقصرتش في حاجة غرام: إنت عارف نزول الأستاذ صلاح معايا معناه إيه؟، معناه إن الأوردر لو حصل فية غلطة واحدة؛ بخصم 10 آلاف جنيه، حتي لو مرتبك مكنش 10 آلاف هقولهالك قدام الأستاذ تدفع من جيبك إسلام: أنا مقصرتش في حاجة غرام: أيوة إفرض الراجل دلوقتي ما جابش الناس، إفرض الراجل مكانش جايب الأطفال، وأنا متخيله إن ده هيحصل إسلام: دي مش بتاعتي أنا مش عارف الناس بتفكر إزاي، أنا هروح في داهية علشان حضرتك تشتغلي غرام: أنا عمري ما هوديك في داهية، بص يا إسلام إنت لو عارف إنك هتروح في داهية من البداية؛ مكونتش دخلت في الموضوع