لميس الحديدي تكشف كواليس إصابتها بالسرطان قبل 10 سنوات وموقف عمرو أديب (فيديو)

كشفت الإعلامية لميس الحديدي، لأول مرة عن سر من أسرارها التي لم تكشفها من قبل للإعلام، والمتعلق بتفاصيل وكواليس إصابتها بالمرض اللعين.

لميس الحديدي تكشف سبب إخفائها إصابتها بمرض السرطان

وأكدت لميس الحديدي خلال لقائها ببرنامج "منا وفينا" الذي تقدمه هبة حيدري بقناة "المشهد": "أخفيت إصابتي بـ السرطان لإن مش لازم الناس تعرف، المرض جالي من 10 سنين تقريبا والوجع يخصني وبخاف حد يقول بتاجر بحاجة، الوجع يخصني وأنا أخفيته عن ابني لحد لما كبر لإنه كان وقتها في ثانوي".

لميس الحديدي: لهذا السبب أخفيت إصابتي بالسرطان

وتابعت: "لما جالي السرطان استخبيت وأنا عندي زرار جوايا اسمه زرار الدليت، بادوس على أي حاجة بحب أنساها، ولو حد ضايقني بعد سنة بانسى وأسامحه ومش بفتكر هو عمل معايا ايه، هو زرار مسح ونسيان بيعمل جوايا تسامح ونفس لإن لو معملتش مسح للوجع مش هكمل".

من وقف مع لميس الحديدي فترة إصابتها بالسرطان؟

ولفتت: "لما عرفت إني مريضة بالسرطان قلت كابوس وهيعدي والحمد لله لو ربنا أعطاني نعمة في حياتي غير ابني فهو أخد بإيدي، واللي وقف معايا في فترة المرض أمي وعمرو أديب وأصحابي وعائلتي القريبين أوي، محدش كان يعرف".

لميس الحديدي تبكي على الهواء وتكشف كواليس دعم الأستاذ هيكل لها

وأشارت لميس الحديدي باكية: "أنا مش بحب اتكلم عن إصابتي بمرض السرطان لإني بقول أنا مين، انا مبحسش حد مهم أوي إن الناس تعرف حكاياته لإن الناس عندها مشاكلها وحكاياتها، أمي كانت بتدعيلي وعمرو أديب واصحابي وأولاد عمي كانوا بيجوا جلسة الكيماوي بيعلموا ليا حفلة وانا في عالم تاني وفي اليوم التاني كنت أروح اسجل مع الأستاذ هيكل وهو كان عارف بمرضي لإن هو اللي جابلي الدكتور وأسرته كانت زي عيلتي، أستاذ هيكل كان أبويا التاني في فترة وهو اللي سندني ولما كنت بقع يمسك ايدي ويقولي يلا هتبقى كويسة وهنسجل الحلقات بتاعتنا، ومغبتش ولا يوم عن حلقاتي وهي دي الطاقة اللي كانت جوايا قومي وربنا هينصرك وربنا نصرني وحماني".

لميس الحديدي تكشف عن الدرس المستفاد من إصابتها بالسرطان

واختتمت لميس الحديدي:"أهم درس اتعلمته خلال إصابتي بالسرطان إن لكل ست لازم الكشف الدوري واللى حماني وربنا أنقذني إني اكتشفت المرض بدري وكنت بعمل فحص عادي، وده درس اتعلمته".