مصطفى كامل عن وفاة حلمى بكر: بقالنا شهر بنادى الراجل يجيلنا المستشفى

علق مصطفى كامل، نقيب الموسيقيين، على وفاة الموسيقار حلمي بكر، قائلا: "بقالنا شهر بنادى الراجل يجيلنا بالمستشفى، بقالنا شهر يا أستاذ جابر بنطالب، هاتولنا الراجل، بنطالب اللي انتوا عارفينهم، اللي الصحافة والإعلام عارفينهم، إخواته كلهم بيكلمونى، هاتولي الأستاذ حلمى يا جماعة، بنطالب اللي خدوه يعمل نقاهة في الشرقية، بنطالب الدنيا كلها". 

 وأضاف خلال مداخلة هاتفية ببرنامج "مانشيت"، عبر قناة "CBC"، مع الإعلامى جابر القرموطى: "لغاية النهارة، بنقول لابنه انزل، قلبي حاسس هيحصل حاجة لأبوك، انت الوحيد القادر على إنك تروح تاخده من المكان ده، انت ابنه، انت الوحيد اللي تجيبهولي من المكان ده، البقاء لله"، مردفا: "أنا مش هدخل في كلام مش بتاعى، دا كلام أسرته، احنا بناشد وآخرها مع لميس الحديدي، بقالنا فترة بنقول احنا جاهزين والنقابة على أتم استعداد لكل حاجة".  

وواصل: "كل حاجة هتبان للرأي العام، وبقالنا شهر بيتقال علينا كلام من ناس، تخص الأستاذ حلمى، طب فين الراجل؟"، مردفا: "احنا مبنتأخرش، أتأخر على أبويا! ولسه كاتب أول امبارح بوست على الصفحة، وقلت ربنا يطمنا عليك وحسبى الله ونعم الوكيل، دا أخويا وصديق عمري وأستاذي، دا احنا بنشحته بقالنا شهرين، قالولنا أصل بيعمل فترة نقاهة". 

واستطرد مصطفى كامل: "اتحكى حكاية منهم غير اللي بتتقال في الصحافة والإعلام من الطرف التاني، أنا راجع بيتي هتجنن، قالوا دا أخيرا خرج من النقاهة وهيروح مستشفى، قلنا يلا هاتوهولنا وفتحنا مستشفى المعادي والجوابات طلعت وكل حاجة، بس كنا كلنا عارفين". 

 ورحل منذ قليل الموسيقار الكبير حلمي بكر، بعد صراع مع المرض، وذلك بعد مسيرة فنية ممتدة وتاريخ طويل مع أعظم الأعمال الفنية.