نورين شحاتة عن زواج القاصرات: البنت اللي بتكمل 21 سنة مكبرتش ومينفعش تتجوز

عبّرت الإعلامية نورين شحاتة رأيها في ظاهرة زواج القاصرات، أو زواج البنات وهن في سن صغيرة حتى ولو كان سنًا قانونية، مشيرةً إلى أن عواقب هذه الزيجات تكون سلبية بشكل كبير.

وقالت نورين شحاتة خلال تقديمها برنامجها البيه والهانم: اللي عايزين نعرفه أنت لما تجوز بنتك عايزها تعمل إيه أصلا؟ عايزها تتجوز بس وتخلص منها؟ أكيد مبقاش فيه الفكر ده، ومفيش حد بيفكر في أولاده بالطريقة دي، أكيد أنت عايزها تصنع بيت، تكون زوجة واقفة مع زوجها وتكون فاهمة تسنده إزاي، وتربي ولادها إزاي في المجتمع.

الإعلامية نورين شحاتة: البنت مينفعش تتجوز في سن الـ 18 والـ 21

وتابعت نورين شحاتة: وحتى لو كان القانون بيقول إن تمام تتجوز من بعد 18 سنة، الحقيقة إني من وجهة نظري الشخصية شايفة إنه مينفعش زواج البنت حتى بعد 18 ولا 19 ولا 20 سنة، والبنت بتخلص الجامعة في سن الـ 21، وده مش معناه إنها كبرت، ده معناه إنها يادوب خلصت تعليم فـ بتبدأ تدخل في المجتمع وتفهم نفسها وتفهم يعني إيه زوجة ويعني إيه أمومة.

وأضافت نورين شحاتة: ولكل الناس اللي بيقولوا عادي إني أجوز بنتي وهي صغيرة ومفيش مشكلة، وإيه يعني لما تجوز وهي عندها 19 سنة، هنشوف عواقب ده في حلقة النهاردة من برنامج البيه والهانم.

كما وصفت ضيفة برنامج البيه والهانم، والتي تعد حالة على أرض الواقع تعرضت لزواج القاصرات هذا، شعورها الآن بعد زواجها في سن صغير، قائلةً: بزواجي في سن صغير، كسبت ولادي، دكتور ومهندسة وابني التالت في أولى جامعة، وخسرت عمري، لترد عليها الإعلامية نورين شحاتة قائلةً: كلمة مؤثرة جدًا، إنك تكسبي ولادك، طبعا كلنا عشان الولاد بنضيع حياتنا كلها، بس الولاد كدة كدة هنجيبهم لما نكبر، والست قالت أنا خسرت عمري.. فاهمين ده؟ الكلام ده موجه للأهالي.