د. أحمد أمين يجيب: ابنك على طول عيان وتعبان ؟ يخرج من تعب يدخل في التاني؟! هو ده الحل الأمثل (ريبورتاج)

ابنك على طول عيان و تعبان ؟ يخرج من تعب يدخل في التاني ؟! مش عارفة تعملي ايه ؟!! .. شوفي يا ستي اول سؤال تسأليه لنفسك .. بتأكليه أيه ؟! اشمعنى يا دكتور ؟! .. أقول لحضرتك .. إنتي عارفة ان ممكن بالأكل بس ترفعي مناعة ابنك و تحسني قدرة جسمه على مقاومة الأمراض ؟! النهاردة أنا جايبلك لستة الأكل اللي ممكن تعمل كده : 1. الزبادي: بجد ؟. فعلا .. وده لان الزبادي فيه حاجتين مهمين جدا أولاً : باكتيريا اللبن (lactobacillus) و ذي لقو ان ليها دور مهم جدا في الحماية من عدوى الجهاز التنفسي و النزلات المعوية. ثانياً : فيتامين دال : اللي ليه دور مهم جدا في مقاومة الفيروسات و ادوار البرد. 2. الثوم: و ده لانه غني بعنصر مهم جدا و هو الزنك .. (وما ادراك ما الزنك !! .. ده عايز بوست لوحده) الزنك ده مهم لتصنيع كرات الدم البيضاء المسؤولة الاولى عن المناعة في جسم الانسان. 3. الموالح : البرتقال و الليمون و ده لغناها بفيتامين c اللي ليه دور مهم جدا في الوقاية من ادوار البرد و عدوى الجهاز التنفسي. 4. فلفل ألوان : و ده لانه غني بفيتامين c و كمان غني بحاجة تانية جدا و هي الكاروتين .. اللي بتتحول في جسمنا لفيتامين أ الأساسي جدا للحماية من عدوى الجهاز التنفسي و الهضمي أيضاً. 5. اللوز: و ده لانه غني جدا بفيتامين E و العديد من مضادات الأكسدة اللي بتقاوم البكتيريا و الفيروسات. 6. السبانخ: فيتامين c - مضادات أكسدة بالاضافة للحديد ايضاً. 7. البطاطا - الجزر : كاروتين 8. شوربة الفراخ - الفراخ: اجدادنا كتير جدا بيطلع عندهم حق .. شوربة الفراخ فعلا من اهم الحاجات اللي بتقاوم البرد و ده لانها غنية جدا بفيتامين ب ٦ و حاجة تانية اسمها (كارنوزين) المهمين جدا لمقاومة الفيروسات و ادوار البرد الأم الشاطرة لازم تاخد بالها بتأكل ولادها أيه و تبقى عارفة ازاي ترفع مناعتهم. اقرأ ايضاَ:د. أحمد أمين يجيب: إبني بينضرب في المدرسة.. بنتي زميلتها ضربتها في التمرين.. إيه الرد الأمثل؟ د. أحمد أمين طبيب متخصص في طب الأطفال يهدف لنشر الوعي الصحي و تثقيف الأمهات والآباء و مساعدتهم على تهيئة أفضل مناخ صحي و نفسي لأطفالهم